Ekki hér heldur þar, nei ómögulegt þar, betra hér.

Þar sem við virtumst í vondum málum við bryggjuómyndina í Papendrecht var ég orðinn grautfúll yfir þeirri reynslu sem upplýsingar um Hollenskar hafnir voru búnar að bjóða fram að þessu. Eftir að við vorum búin að ráðfæra okkur um nokkra stund við manninn sem tók á móti okkur ákváðum við að fara til Ridderkerk og leggjast þar. Út vildum við fara þótt við yrðum að bakka sömu leið og við komum, þótt ekki væri það fýsilegt í þessum þrengslum, en fyrst var ákveðið að reyna að snúa. Bauðst maðurinn til að halda stefninu eins þétt að bryggjunni og hann gæti meðan ég snéri bátnum með skrúfunum og sagði mér að fara nær syðri kanti sundsins en þeim nyrðri til að fá örugglega nægt dýpi. Einnig varaði hann mig við hraðferju sem gengi fyrir sundið á hálftíma fresti og sæist ekki fyrr en maður væri kominn út úr því og þá hugsanlega of seint. Nú var aftur sett í gang og með því að maðurinn hélt stefninu með spotta þétt að bryggjunni náði ég að snúa bátnum án þess að reka skrúfurnar í og fikruðum við okkur nú út með bryggjunum og út sundið. Þegar við vorum inn við bryggjurnar sáum við ferjuna æða fyrir sundið svo ekki þurfti að hafa frekari vara á henni og því haldið beint út á fljótið og stefnan tekin norður til Ridderkerk. Komum við þangað eftir hálftíma siglingu. Höfnin í Ridderkerk er þrískipt, norðan í henni er flutningahöfn en sunnan í henni eru tvær yachthafnir önnur á vegum bæjarins en hin á vegum Ridderkerk Yacht Club. Eftir lítilsháttar togstreitu milli okkar frú Lilju um hvar við ættum að leggjast, sem hún vinnur alltaf, var lagst við bryggju utarlega í bæjarhöfninni í hið ágætasta pláss.

 

Nú er það svo að þegar komið er í yachthafnir þá sér maður eðlilega fyrst auðu plássin yst í höfnunum en ef maður fikrar sig innar má oftast finna þar laus pláss einnig, sem þýðir að styttra er að labba í alla þjónustu. Ef gestabryggjur eru ekki merktar sérstaklega, sem er oft, getur verið mismunandi skoðun meðal þeirra sem eru um borð á því hvar skuli leggjast, einn bendir þarna og segir “leggjumst hér” annar bendir annað, “ það er miklu betra þarna” og geta upphafist hinar flóknustu deilur meðan hver heldur fram ágæti síns staðar ef margir eru um borð. Hver kannast ekki við hliðstætt dæmi þegar margir eru í tjaldferðalagi saman. Þegar kemur að því að fara að tjalda þá kemur “tjöldum hérna”, næsti “nei þetta er ómögulegt tjöldum heldur þarna” og sá næsti “nei þarna er miklu betri staður”. Svona getur farið lengri tími í að bítast um hvar eigi að tjalda með tilheyrandi rápi fram og aftur um staðinn. Því var það einu sinni þegar við frú Lilja vorum á tjaldferðalagi með þrem öðrum hjónum og búið var ganga í gegnum framangreinda togstreitu í tvö kvöld þegar ég sagði við samferðafólkið. Nú höfum við það þannig það sem eftir er ferðarinnar að annað kvöld ráða þessi hjón hvar er tjaldað, svo næstu og þá þar næstu sem ég tilgreindi röðina á og hinir þegja og sætta sig við það. Allir samþykktu þessa aðferð og voru alsælir það sem eftir var ferðarinnar með tilhögunina. Þessa aðferð má nota um borð í skemmtibát en reyndar er þetta einfaldara þar því að það er alveg sama hvað hver segir, kafteinninn ræður.